電話響起～
一位女士：「姑娘你答我隻豬係咪有毒？」
我點知你隻豬有冇毒啫，問食家啦，個食家食完瓜咗咪有毒囉。
我：「唔好意思小姐，我唔係好明你問咩」
嘟。佢CUT咗我線。
隔咗十零分鐘，電話又響起。
我：「喂，你好，乜乜診所」
一位女士：「我呀，頭先打過嚟，頭先我奶奶聽住㗎」
我：「哦？你係問有冇毒嗰位」
佢：「係呀，我轉頭再打嚟，你直接話有毒得㗎啦」
嘟。佢又CUT咗我線。
今次好快電話又響。
我：「你好，乜乜診所」
一位女士：「姑娘呀，隻豬係咪有毒呀？」
…點呀，唔好陰我喎！
我：「唔好意思小姐，你可唔可以講清楚你係想問啲咩？咩嘢豬呀？」
嘟。佢再CUT咗我線。
隔咗陣，電話又響起。
一位女士破口大罵：「死豬西，你係咪玩嘢呀！頭先咪嗌你直接話有毒囉，你問乜咩嘢豬呀？」
我：「我唔可以亂咁答㗎，有啲咩事我負責唔起㗎，而且我都唔明你問緊啲咩，咩嘢豬呀？」
佢：「你唔駛理㗎，我會搞掂㗎啦！你答有毒就得㗎啦」
嘟。又CUT我線。你不如自己搞掂啦，我咩都唔想答呀。
今次又好快電話響起。
一位女士：「姑娘你頭先話豬有毒呀可？」
…我可唔可以CUT返次線？
我：「…豬有冇毒呢…就唔到我講嘅，要拎去驗驗先知，如果食完…」
我聽到佢『妖』咗我一聲先CUT線。我想講有咩唔舒服不如嚟睇醫生，我呢句對白好重要㗎！每日返工都要講幾十次㗎！
電話再響起。
我都廢事再講開場白，直接拎起聽佢講嘢。
佢細細聲重覆講：「死豬西！死豬西！死豬西！死豬西！死豬西！」
做咩啫你？
喺佢鬧緊我期間，我聽到佢嗰邊有把女人聲講『食得飯啦，有肉餅食呀，今次有八分之一粒咸蛋黃呀』
女士：「又係肉餅…」
嘟。佢CUT咗我線。
你就好啦，咁早開飯，不過我比較關心仲有八分之七粒咸蛋黃去咗邊。
Search